Breskur faðir ber sig afar illa en hann er ákærður fyrir að stinga 14 ára dóttur sína til bana og réttarhöld yfir honum standa nú yfir. Segist hann vera óheppnasti maður í heimi og fullyrðir að þau feðginin hafi bara verið að fíflast sem hafi endað með þessum hörmulega hætti.
Mirror greinir frá málinu. Maðurinn heitir Simon Vickers og er fimmtugur en dóttir hans hét Scarlett.
Síðastliðið sumar lést Scarlett á heimili þeirra, í bænum Darlington í norðurhluta Englands, af völdum þess að hnífur stakkst alls 11 sentímetra inn í brjóstkassa hennar og endaði á því að gera gat á hjartað. Scarlett missti það mikið blóð að ekki reyndist unnt að bjarga lífi hennar.
Faðir Scarlett er ákærður fyrir að stinga hana viljandi en hann fullyrðir að þau hafi verið í gamnislag.
Í yfirheyrslu hjá lögreglu sagði hann þau hafa verið að henda vínberjum hvort í annað en hann haldið að hann hefði hent töngum úr eldhúsinu í Scarlett. Sagði hann þau bara hafa verið að fíflast og hann hlyti því að vera óheppnasti maður í heimi.
Á meðan þetta gekk á var Sarah móðir Scarlett og eiginkona Simon að elda kvöldmat. Tjáði hann lögreglu að hann ætti bágt með að trúa að þessi leikur þeirra feðgina hafi endað svona.
Saksóknarar segja hins vegar að stungusárið á Scarlett hafi verið allt of djúpt til að hafa verið orsakað af slysni.
Réttarmeinafræðingur fullyrti fyrir dómi að það væri ómögulegt að valda svona djúpu sári með því að kasta hnífi.
Vickers fullyrti við lögreglu að hann hafi ekki gert sér grein fyrir að hann hafi kastað hnífi í dóttur sína fyrr en hann sá hana liggja í blóði sínu á gólfinu. Neitar hann að hafa sagt við sjúkraflutningamenn að hann hefði beitt hnífi gegn henni þar sem hún hafi ráðist á hann.
Saksóknari sagði við réttarhöldin að það sé ljóst að Simon Vickers hafi haldið fast um hnífinn og stungið dóttur sína viljandi. Vickers og lögmaður hans fullyrða að um óviljaverk hafi verið að ræða og að hann myndi aldrei hafa skaðað dóttur sína viljandi.
