Belgíska matvælastofnunin hefur sent út aðvörun til landsmanna þar sem þeir eru varaðir við að borða jólatrén sem þeir henda nú að jólunum loknum. Aðvörunin var send út í kjölfar þess að borgarstjórnin í Ghent hvatti borgarbúa til að draga úr magni sorps með því að elda jólatrén og borða þau.

Borgarstjórnin hratt herferð af stað fyrir rúmri viku þar sem fólk er hvatt til að borða jólatrén í stað þess að henda þeim. Meðal annars var stungið upp á að fólk borði barrið með því að búa til smjör með bragði úr því. „Með þessu verður jólatréð þitt ekki 100% rusl,“ sagði á vefsíðu borgarinnar.

Þar sagði einnig að innblásturinn að uppskriftinni sé sóttur til Skandinavíu.

Matvælastofnuninni hryllir greinilega við þessari herferð borgaryfirvaldanna og bendir á að þetta sé ekki örugg leið til að endurvinna jólatré og að það sé ekki hægt að tryggja að það að borða jólatré sé öruggt, hvorki fyrir fólk né dýr.

Í kjölfarið sendu borgaryfirvöld frá sér yfirlýsingu þar sem segir að hafa þurfi í huga að ekki séu öll jólatré æt.