Borin hafa verið kennsl á rotnandi lík sem fannst í yfirgefinni Teslu söngvarans D4vd í Kaliforníu mánudaginn 8. september. Um unglingsstúlku er að ræða að sögn yfirvalda í Los Angeles á þriðjudag. Bifreiðin hafði verið haldlögð af yfirvöldum í vikunni á undan og flutt á bifreiðastæði á hennar vegum.

Lík stúlkunnar var vafið inn í plast og var í læstu skotti Teslunnar, þar sem sólin skein á bílinn í hitanum í Kaliforníu í að minnsta kosti fimm daga. Líkið var svo illa rotnað að það var ekki alveg heilt og var tilkynning til yfirvalda á þá leið að mikla ólykt lagði frá bílnum.

D4vd, sem heitir löglega David Anthony Burke, var tengdur málinu eftir að yfirvöld röktu bílnúmer Teslunnar með Texas-númeraplötunni við hann. Hann hafði ekki tilkynnt bifreiðina stolna.

Nafn stúlkunnar hefur ekki verið gefið upp þar sem enn er eftir að tilkynna einhverjum ættingja hennar um málið. Samkvæmt heimildum ABC 7 var stúlkan á aldrinum 14 til 15 ára. Stúlkan mun hafa verið 175 sm á hæð, með bylgjað svart hár og aðeins um 34 kg, sem um það bil 10 kg minna en meðalstúlka af hennar hæð ætti að vega.

Stúlkan fannst í stuttermabol, svörtum leggings og með gult armband og eyrnalokka. Hún var einnig með húðflúr á hægri vísifingri sem á stóð „Shhh…“

Burke hefur sýnt fullt samstarf við lögregluna á meðan hann heldur tónleikaferðalagi sínu áfram.

Þegar líkið fannst í bílnum var Burke að undirbúa tónleika í Minneapolis og hafði verið að deila stöðugum færslum með tveimur milljónum fylgjenda sinna á Instagram.

Þrátt fyrir fullt samstarf við yfirvöld hefur ferill hans borið hnekki vegna málsins. Fyrirtækið Crocs og Hollister sleit samstarfi þeirra aðeins nokkrum dögum eftir að tilkynnt var að Burke væri andlit samstarfsverkefnisins „Dream Drop“. Myndirnar af vörunni sem Burke var fyrirsæta fyrir voru allar birtar, en andlit hans var klippt burt.