Í myndbandi sem deilt var á TikTok má sjá hávært rifrildi sem braust út meðal hóps flugfarþega þegar einn þeirra freistaði þess að sleppa röðinni og komast fyrst út úr vélinni. Olli athæfi hennar reiði annarra farþega og hávært rifrildi braust út.
Í myndbandinu má sjá konuna, sem mun vera lögfræðingur, fyrst æsa sig við flugþjón sem hafði rétt áður skammað hana fyrir að fylgja ekki réttum siðareglum við útgöngu.
„Þið eruð öll að væla að ástæðulausu,“ heyrist konan svara. „Standið bara upp þegar þið viljið, takið bara á þessu gott fólk, guð minn góður.“
„Bíddu eftir að fólkið fyrir framan þig er staðið upp og hefur yfirgefið vélina. Þannig gerum við þetta,“ sagði karlmaður við hana. Konan svaraði því einfaldlega með: „Haltu kjafti!“
@itsme_brianli“low iq human being” 💀
Í bakgrunninum má heyra barn gráta, um leið og einn farþegi byrjar að hrópa „Karen!Karen!“ sem er viðurnefni yfir miðaldra konur sem telja sig rétthærri en aðrir einstaklingar.
„Það eruð þið sem eruð Karen, af því þið eruð að gera læti út af þessu,“ segir konan sem gefur sig ekki þumlung í frekjunni.
Eftir að hafa sagt fyrri karlmanninum að halda kjafti, skammaðist konan síðan við annan karlmann sem skammaði hana fyrir að rífa kjaft auk þess að gera grín að framburði hans.
„Þú ert greinilega rasisti,“ heyrist einn karlmaður til viðbótar segja.
Netverjar tjáðu sig við myndbandið og segja konuna hafa tekið dónaskap á hærra stig.
„Guð minn góður, hún er með ljótan persónuleika,“ skrifaði einn. „Það er almenn kurteisi að fremstir fara fyrstir út,“ sagði annar.
Einhverjir komu konunni til varnar og sögðu að þegar kemur að rökræðum væri heimurinn greinilega hennar réttarsalur. „Mér fannst hún nokkuð góð. Hún hafði svar við öllu sem kastað var til hennar.“
