Eftir að hafa sofið vært í rúmlega 250.000 ár er eldfjallið Uturuncu, sem er í suðurhluta Bólivíu, farið að bæra á sér. Þetta eru auðvitað töluverð tíðindi því eldfjallið hefur ekki bært á sér síðan Homo sapiens náði fyrir alvöru fótfestu.

Vísindamenn hafa fylgst vel með eldfjallinu síðan á tíunda áratugnum og fyrir liggur að þar á landris sér stað. Miðja fjallsins hefur hækkað en svæðin í kring hafa lækkað. Þetta er óeðlilegt og getur reynst hættulegt.

Samkvæmt niðurstöðu nýrrar rannsóknar, þá hafa vísindamenn komist að því að þessa aflögun eldfjallsins megi rekja til gríðarstórs kvikuhafs sem ýtir heitum vökvum og lofttegundum upp að yfirborðinu. Þetta er ekki eitthvað sem á sér stað daglega og alls ekki eitthvað sem hægt er að hunsa.

Vísindamennirnir leggja áherslu á að ekkert bendi til að eldgos sé yfirvofandi en benda um leið á að það sé ekki bara friður og ró því þegar „dautt“ eldfjall fer að sýna lífsmerki, breytist skilgreiningin á „öruggt“ út frá jarðfræðilegu sjónarmiði.