Eins og DV greindi frá í morgun varð ákveðið uppnám á flugvellinum í Hanoi í Víetnam þegar flugvél Frakklandsforseta lenti. Skömmu áður en hjónin stigu út úr vélinni virtist eitthvað eiga sér stað og sást þegar Brigitte ýtti í andlit eiginmanns síns – eins og hún væri ósátt við eitthvað.
Sjá einnig: Myndband virðist sýna uppnám á milli Macron og eiginkonu hans – Ýtti í andlitið á honum
Skrifstofa forsetans neitaði því í fyrstu að myndefnið væri ekta en viðurkenndi síðar að það væri ósvikið. Mail Online hafði eftir nánum bandamanni forsetans að um „saklausa deilu“ hafi verið að ræða á milli hjónanna og Macron tók í sama streng þegar hann var spurður út í málið á blaðamannafundi í Víetnam í dag.
„Við vorum að grínast, ég og konan mín. Þetta var ekkert,“ sagði hann.
En Judi James, sérfræðingur í líkamstjáningu, segir að svo virðist sem Macron sé ekki að segja allan sannleikann. Hann hafi virst „reiður og taugaóstyrkur“ eftir að hafa fengið hendur eiginkonu sinnar í andlitið og þar að auki hafi honum virst brugðið.
„Ég myndi ekki lýsa þessu sem við sjáum þarna sem saklausu gríni á milli hjóna, eins og Macron og hans teymi hafa viljað meina,“ segir hún. Bendir hún á að Brigitte hafi ýtt honum það fast að höfuðið vék til hliðar og Macron hafi þurft að styðja sig við til að halda jafnvægi. Ekki sé réttlætanlegt að kalla það „skemmtun“ til að bjarga pólitísku áliti.
Þá bendir Judi á að Macron hafi rétt fram handlegginn í áttina að Brigitte áður en þau gengu niður stigann að flugbrautinni en Brigitte hafi ekki tekið í hann. Og þegar niður var komið hafi Macron kreppt annan hnefann og virst vera reiður.
„Ég myndi kallað þetta sjokkarandi og ég myndi segja það sama varðandi hvaða par sem er, hvar sem er,“ segir Judi og nefnir að lokum að það sem kallað hefur verið „grín“ á milli hjónanna endurspeglist ekki í líkamsmáli þeirra.
