Myndband sem dýraverndunarsamtökin TideBreakers tóku og birtu á miðlum sínum varpa ljósi á þær ömurlegu aðstæður sem dýrin lifa í.
Háhyrningarnir tveir, hin 23 ára Wikie og afkvæmi hennar, hinn 11 ára Keijo, svamla stefnulaus um sundlaugina í garðinum sem farin er að láta á sjá vegna skorts á viðhaldi.
Marketa Schusterova, meðstofnandi TideBreakers, segir að um neyðarástand sé að ræða sem þarfnist athygli allrar heimsbyggðarinnar. Telur hún að dýrin muni drepast ef þau verða ekki flutt á annan stað þar sem þau fengju nauðsynlega örvun og umönnun.
Sædýragarðinum var lokað þann 5. janúar síðastliðinn í kjölfar gildistöku laga sem banna sýningar með hvali og höfrunga. Í umfjöllun Mail Online kemur fram að síðan þá hafi forsvarsmenn Marineland verið að skoða ýmsa mögulega um hver dýrin geti fengið nýtt heimili en, hingað til, án árangurs.
Þó að garðinum hafi verið lokað í janúar síðastliðnum bera eigendur garðsins enn lagalega ábyrgð á velferð dýranna þar til þeim hefur verið komið annað. Þar sem báðir háhyrningarnir fæddust í vernduðu umhverfi er talið ómögulegt að þeir gætu lifað af í náttúrunni.
Í frétt Mail Online segir að lítill hópur starfsmanna sjái til þess að dýrin fái að borða, en andleg örvun sem er mikilvæg fyrir háhyrninga er nánast engin.
Nokkrir möguleikar hafa verið skoðaðir fyrir dýrin, til dæmis sædýragarðurinn Loro Parque á Tenerife sem margir Íslendingar hafa heimsótt. Spænsk yfirvöld höfnuðu því þó það taka á móti Wikie og Keijo. Tveir möguleikar eru því sagðir vera eftir; annars vegar hvalafriðland WSP í Nova Scotia í Kanada og sædýragarður í Japan. Eini raunhæfi kosturinn er þó talinn vera Kanada.
„Eftir að hafa skemmt almenningi í fjölda ára þá ber okkur skylda til að veita þeim hreint og öruggt umhverfi þar sem þau geta eytt lífi sínu,“ segir Marketa.
