Mikið var fjallað um mál drengsins, Émile Soleil, á sínum tíma en hann hvarf þegar hann var í heimsókn hjá afa sínum og ömmu í umræddu þorpi. Í mars 2024 fundust líkamsleifar hans, þar á meðal höfuðkúpa, skammt frá staðnum þar sem hann sást síðast á.
Sjá einnig: Risastórar vendingar í máli Émile litla sem hvarf sumarið 2023
Philippe og Anne Vedovini, sem bæði eru 59 ára, voru handtekin í morgun og færð í varðhald ásamt tveimur börnum sínum sem eru um eða innan við tvítugt. Þá var húsleit gerð á föstum dvalarstað þeirra sem er í nágrenni frönsku borgarinnar Marseille.
Le Parisien greindi frá því í gærkvöldi að lögregla hefði hlerað síma nánustu aðstandenda Émile mánuðum saman áður en hún lét til skarar skríða. Þá greindu fjölmiðlar frá því að yngra barn hjónanna sem var handtekið, 18 ára piltur, hafi verið rifinn úr rúminu sínu í gærmorgun af lögreglumönnum sem ruddust inn gráir fyrir járnum.
Þessar símhleranir virðast hafa gert það að verkum að lögregla er viss í sinni sök um hver réði drengnum bana.
Lögregla hefur gert húsleit á heimili hjónanna og er hestakerra sögð vera á meðal sönnunargagna í málinu. Leikur jafnvel grunur á að kerran hafi verið notuð til að flytja lík Émile eftir andlát hans.
Ekkert hefur verið gefið upp um ástæðu þess að drengnum var ráðinn bani en vænta má þess að frekari upplýsingar komi fram á næstu dögum.
