Rúmlega sextíu þúsund blaðsíður af gögnum voru birt í síðustu viku um morðið á John F. Kennedy, fyrrum Bandaríkjaforseta. Donald Trump Bandaríkjaforseti undirritaði tilskipun í janúar um að gögnin yrðu gerð opinber en samsæriskenningar hafa lengi gengið um ódæðið.
Margir sem höfðu beðið spenntir eftir þessum gagnapakka urðu þó fyrir sárum vonbrigðum þegar gögnin voru birt enda var þar ekki að finna neina stóra sprengju sem kollvarpað gæti skilningi almennings á málinu og sannað samsæriskenningarnar svo hafið sé yfir skynsamlegan vafa. Sú staðreynd að leynd hefur verið yfir gögnunum áratugum saman hefur virkað sem olía á eld samsærisins en nú virðist sem svo að meiningin hafi ekki verið að leyna því hver stóð í raun og veru á bak við morðið heldur að leyna þeim aðferðum sem leyniþjónustan, CIA, beitti við njósnir.
Það sem meira var þá var í skjölunum að finna mikið af viðkvæmum persónuupplýsingum um einstaklinga, þar með taldar kennitölur. Til dæmis mátti þar finna upplýsingar um lögmanninn og fyrrum starfsmann Trump, Joseph diGenova, en hann vann fyrir nefnd á áttunda áratugnum sem var falið að rannsaka misnotkun á valdi hjá hinu opinbera. Hann ætlar nú að stefna ríkinu fyrir brot gegn friðhelgi einkalífs.
En hverju trúir Donald Trump um morðið á Kennedy? Forsetinn svaraði spurningunni í samtali við miðilinn OutKick um helgina. Þar var hann spurður hvort hann trúi því að Lee Harvey Oswald hafi skotið Kennedy til bana þann 22. nóvember árið 1963.
„Ég trúi því, og hef alltaf gert,“ sagði forsetinn en bætti við: „En spurningin er þó, fékk hann hjálp?“
Eins og áður segir eru til margar samsæriskenningar um morðið, þar með talið að mafían eða CIA hafi einhvern veginn komið við sögu. Almennt þykir flest þó benda til þess að Oswald hafi verið einn á báti.
Trump tók undir með gagnrýnendum að gögnin sem birtust í síðustu viku hefðu ekki verið nein sprengja. „Þau reyndust frekar óspennandi og kannski er það bara gott.“
