Í byrjun desember gerði bandaríska alríkislögreglan FBI óhugnanlegan fund á sveitabæ í Virginíu. Þar býr Brad Spafford með eiginkonu sinni og tveimur börnum. Ekki var annað að sjá en hann væri ósköp venjulegur bandarískur fjölskyldufaðir en hann átti sér greinilega skuggalegt leyndarmál.

Heima hjá honum fann FBI rúmlega 150 sprengjur, skotvopn og eitt og annað tengt sprengjugerð. Hann var að sjálfsögðu handtekinn og hefur setið í gæsluvarðhaldi síðan. FBI hafði unnið að rannsókn málsins í rúmt ár að sögn Washington Post.

Samkvæmt því sem kemur fram í dómskjölum þá hafði lögreglan aldrei áður fundið svona mikið magn af heimagerðum sprengjum á einum stað. Í skjölunum kemur fram að fjöldi sprengna hafi fundist í bakpoka í einu svefnherbergi hússins.

Einnig fannst fjöldi ljósmynda af Joe Biden, forseta, sem höfðu greinilega verið notaðar sem skotskífur.

Saksóknarar segja að Spafford hafi sagt að morð á stjórnmálamönnum þyrftu að verða vinsæl á nýjan leik í Bandaríkjunum.

Spafford hefur aldrei verið komið við sögu lögreglunnar vegna ofbeldis- eða vopnalagabrota og því hefur mál hans vakið mikla athygli.