Fjárfestirinn og auðmaðurinn Mark Cuban segist muna það skýrt hvenær hann áttaði sig á því að Donald Trump væri loddari. Þetta kom fram í DailyShow á mánudaginn þar sem Cuban, sem líkt og Trump hefur gert það gott í raunveruleikasjónvarpi, sagðist árið 2016 hafa áttað sig á því að hann vildi ekkert hafa með Trump að gera. Hann hafði trú á Trump áður en hann kynntist honum.
Cuban þekkja margir úr raunveruleikaþáttunum Shark Tank þar sem hann var meðal „hákarla“-fjárfesta sem frumkvöðlar reyndu að heilla með viðskiptahugmyndum sínum.
Cuban segir að honum hafi líkað ágætlega við Trump. Þeir hafi í þrígang átt langar samræður símleiðis en það var í þriðja símtalinu sem Cuban áttaði sig á að Trump var ekki allur þar sem hann er séður.
„Við vorum að tala um kappræður fyrir CNBC sem hann ætlaði ekki að mæta til. Og ég sagði: Donald, hvers vegna mætirðu ekki í lítið fyrirtæki þarna á svæðinu, situr þar við borðið og sýnir viðskiptavitið þitt. Sýndu fólkinu bara að þú ert viðskiptamaður.
Hann segir þá: „Donald Trump og Mark Cuban mæta ekki heim til fólks í mat. Ertu að djóka í mér?“. Og þetta er hver hann er. Þegar við töluðum um grundvallarstoðir hans í pólitíkinni sagði hann: „Ég er með allt þetta trúaða lið sem á eftir að sjá um alla vinnuna fyrir mig“.“
Cuban sagði þetta símtal hafa komið á mikilvægum tíma. Hann hafði borði virðingu fyrir Trump og jafnvel íhugað að bjóða sig fram með honum árið 2016. Hann hafði lofað Trump fyrir að tala tæpitungulaust og svara spurningum af hreinskilni frekar en af pólitískri kænsku. En þetta símtal sýndi rétta andlit Trump, að mati Cuban.
Cuban segist líka hafa áhyggjur af framboði Trump um þessar mundir en fjársterkir aðilar úr tæknibransanum hafi tekið yfir framboðið og misst alla tengingu við raunveruleikann. Tæknirisarnir eru gjarnan kenndir við Silicon Valley í San Fransisco.
„Að sjá hvað er að gerast núna í Silicon Valley er galið. Þetta snýst ekki um stuðning. Þetta er yfirtaka, þeir eru að reyna að koma sér í þá stöðu tl að hafa eins mikil völd og þeir geta. Þeir vilja fá Trump sem forstjóra Bandaríkjanna og þeir vilja sjálfir sitja í stjórninni sem segir honum fyrir verkum.“
Tæknirisarnir hafi misst tengingu við raunveruleikann og sjái fyrir sér að reka Bandaríkin eins og fyrirtæki. Í stað forseta sé forstjóri og eðlilegast sé að forstjórinn og stjórnin komi úr hópi þeirra þar sem þeir eru svo ríkir.
„Stundum kemst maður ekki hjá því að hugsa að þeir hafi misst tengingu við raunveruleikann“
Cuban sagði í öðru viðtali á dögunum að Trump hafi verið óheiðarlegur þegar hann starfaði í heimi viðskipta og engin ástæða til að ætla annað en að hann sé óheiðarlegur í pólitík. Cuban hefur opinberlega lýst yfir stuðningi við framboð Kamala Harris þar sem hann segist ekki vilja: „sölumann snákaolíu sem forseta“
Donald Trump muni alltaf setja eigin hag ofar hagsmunum Bandaríkjanna.
