Harmleikur átti sér stað í Indónesíu í síðustu viku þegar 36 ára gömul kona var étin af kyrkislöngu. Sirati fór að heiman á þriðjudegi til að kaupa lyf halda barni sínu sem er veikt. Hún skilaði sér svo ekki heim svo ættingjar hennar fylltust áhyggjum og fóru út að leita að henni. Eiginmaður hennar, Adiansa fann inniskó konu sinnar og buxur á jörðinni um hálfum kílómetra frá heimili þeirra í þorpinu Siteba.

Lögregla greinir frá því að eiginmanninum hafi í kjölfarið orðið ljóst hvað var um konu hans þegar hann sá risastóra kyrkislöngu um 10 metrum frá veginum. Slangan var alveg einstaklega mikil um sig. Adiansa kallaði til liðsauka, náði slöngunni og risti hana á kvið. Þar fann hann líkamsleifar konu sinnar.

Fyrir um mánuði síðan fannst önnur kona látin í maga kyrkislöngu í Indónesíu. Árásir sem þessar þykja sjaldgæfar og því fáheyrt að tvö andlát eigi sér stað í Indónesíu með svona stuttu millibili. Um er að ræða slöngur af gerðinni malayopython reticulatus sem eru þær lengstu í heimi og ekki óþekkt að þær séu á bilinu 6-10 metrar á lengd. Þessar slöngur hafa á sér orð fyrir að vera árásargjarnar.

Kyrkislöngur af þessari gerð sitja fyrir bráð sinni. Þær ráðast svo á bráðina og vefja sér utan um hana og kæfa áður en þær gleypa hana.