Tedros Adhanom Ghebreyesus, framkvæmdastjóri WHO, segir að veira sem veldur mænusótt eða lömunarveiki hafi þegar greinst í sýnum sem tekin hafa verið á svæðinu. Ekki hafa komið upp nein staðfest tilfelli mænusóttar en WHO segir að það geti verið fljótt að breytast.
Mænusótt getur lagst á taugakerfi líkamans og valdið lömun eða dauða þó að í flestum tilfellum séu einkenni sjúkdómsins væg. Eldra fólk og nýburar eru útsettari fyrir alvarlegum veikindum.
Það eru fleiri sjúkdómar sem valda WHO áhyggjum og þannig eru þegar staðfest 100 þúsund tilfelli af lifrarbólgu A á Gaza frá innrás Ísraels á Gaza í október í fyrra. Lifrarbólga A smitast með saursmiti eða með því að neyta matar eða drykkjar sem er mengaður af saur einstaklings sem er með veiruna. Bóluefni er til við bæði mænusótt og lifrarbólgu A.
Þá eru komin upp yfir milljón staðfest tilvik af öndunarfærasjúkdómum, 500 þúsund tilfelli af niðurgangi og um hundrað þúsund tilfelli af hárlús og kláðamaur.
Allt þetta hefur valdið enn meira álagi á heilbrigðiskerfi Gaza sem er fyrir löngu komið að fótum fram.
