Tvær skammbyssur, sem Napóleon Bonaparte ætlaði eitt sinn að nota til að svipta sig lífi, voru seldar á uppboði í Frakklandi á sunnudaginn og fengust 1,7 milljónir evra, sem svarar til um 255 milljóna íslenskra króna, fyrir þær.

The Guardian skýrir frá þessu og segir að áður en að uppboðinu kom hafi frönsk stjórnvöld lagt bann við því að byssurnar verði fluttar úr landi því þær flokkast sem þjóðargersemi.

Uppboðshaldarinn reiknaði með að 1,2 til 1,5 milljónir evra fengust fyrir byssurnar söluverðið var aðeins hærra þegar upp var staðið.

Ekki hefur verið skýrt frá hver kaupandinn er.

Byssurnar eru fagurlega skreyttar með gulli og silfri og mynd af Napóleon í fullum keisaraskrúða prýðir byssurnar. Sögur herma að hann hafi næstum notað þær til að svipta sig lífi 1814 þegar hann neyddist til að láta af völdum eftir að erlend herlið höfðu sigrað her hans og hertekið París.

Napóleón er sagður hafa verið mjög langt niðri eftir ósigurinn og hafi ætlað að svipta sig lífi með byssunum en það tókst ekki því samstarfsmaður hans tók púðrið úr þeim. Napóleon tók þá eitur en ældi því fljótt upp og lifði af.