42 ára Norðmaður varð fyrir því óláni að týna farsímanum sínum haustið 2022. Það reyndist honum dýrkeypt því í síðustu viku var hann dæmdur í 11 ára fangelsi en dómurinn tengist símanum góða.

Málið hófst haustnótt eina árið 2022. Þá fundu tveir lögreglumenn síma á götunni í miðbæ Fredrikstad. Hann var ólæstur. Enginn nærstaddur kannaðist við að eiga símann og lögreglumennirnir opnuðu hann því í von um að geta komist að hver átti hann.

Í myndasafninu voru myndir af manni sem þótt líklegur til að vera eigandi símans. En það voru líka myndir sem bentu til þess að maðurinn seldi fíkniefni.

Húsleit var gerð heima hjá manninum daginn eftir. Þar fundust fíkniefni og tæki til fíkniefnaframleiðslu. Einnig fundust nokkrar milljónir í reiðufé.

Rannsókn lögreglunnar leiddi í ljós að maðurinn seldi fíkniefni um allt land. Dómarinn fann hann sekan um að hafa selt að minnsta kosti 10,5 kíló af amfetamíni, 1.200 MDMA-töflur, hálft kíló af hassi, nokkur grömm af kókaíni og fleiri efni. Taldi dómarinn ekkert hafa komið fram sem mætti virða manninum til refsilækkunar. Niðurstaðan var því 11 ára fangelsi.