Á fimmtudagskvöldið hófst leit að 45 ára indónesískri konu sem skilaði sér ekki heim á tilsettum tíma. Íbúar í bænum Kalempang hófu þá leit að henni og ekki leið á löngu þar til þeir fundu eigur hennar. Skömmu síðar fundu þeir risastóra kyrkislöngu með útþaninn maga.

Norska ríkisútvarpið segir að bæjarbúar hafi orðið ásáttir um að rista kvið slöngunnar upp. Inni í henni fundu þeir konuna sem var látin. Slangan hafði gleypt hana í heilu lagi og var líkið í fötunum.

Það er sjaldgæft að kyrkislöngur gleypi fólk í einum bita en á síðustu árum hefur slíkt gerst nokkrum sinnum í Indónesíu.