Á fimmtudag í síðustu viku lést 15 ára piltur eftir að hann var barinn hrottalega af hópi árásarmanna í bæ sunnan við París. Þetta var ekki fyrsta ofbeldisverkið í síðustu viku gagnvart frönskum skólabörnum. Fyrr í vikunni var unglingsstúlka barin illilega og var um tíma í dái. Ráðist var á hana utan við skóla hennar í Montpellier í suðurhluta landsins. Þrír hafa verið handteknir vegna málsins. Meðal hinna handteknu er stúlka úr sama skóla.

The Guardian skýrir frá þessu og segir að árásin á fimmtudaginn hafi átt sér stað í Viry-Chatillon, sem er um 20 km sunnan við París. Hafi hópur fólks ráðist á piltinn þegar hann yfirgaf skólann sinn seinnipart dags. Lögreglan vinnur að rannsókn málsins en enginn hefur verið handtekinn vegna þess enn sem komið er.

Emmanuel Macron, forseti, heimsótti grunnskóla í París á föstudaginn og sagði þá að Frakkar glími við mörg ofbeldisverk unglinga og jafnvel meðal barna. Það verði að verja skólana gegn þessu, þeir verði að vera athvarf fyrir börn, fjölskyldur þeirra og kennara.