Winston Churchill, þekktasti forsætisráðherra Bretlands, missti margar tennur á þrítugsaldri og lét því gera fjögur sett af gervitönnum fyrir sig.  Tennurnar voru honum svo mikilvægar að hann hafði alltaf tvö sett með sér hvert sem hann fór.

Tennurnar eru greinilega eftirsóttar því einn gómurinn, sex tennur í efri góm, seldist nýlega á uppboði fyrir 18.000 pund, sem svarar til 3,1 milljóna íslenskra króna.

Það var Cotswold uppboðshúsið sem sá um söluna. Reiknað hafði verið með að 8.000 pund fengjust fyrir þær en þegar upp var staðið var söluverðmætið rúmlega tvöfalt hærra.

The Guardian segir að talið sé að eitt sett af tönnum hafi verið grafið með Churchill. Hann tók við embætti forsætisráðherra 1940 og var við stjórnvölinn á meðan síðari heimsstyrjöldin stóð yfir. Er hans minnst sem sköruglegs og mjög mælsks ráðherra sem náði vel til þjóðarinnar á þessum erfiðu árum.

Tennurnar, sem voru seldar á uppboði, voru smíðaðar fyrir hann þegar hann var 65 ára.