Lögregla fær allskonar símtöl og eru verkefni hennar oftar en ekki jafn fjölbreytt og þau eru mörg. Lögreglan í Bellevue í Washington-ríki fékk skrýtið símtal á dögunum vegna óvenjulegs hlutar sem fannst í bílskúr látins manns.

Um var að ræða óvirka eldflaug af gerðinni Douglas AIR-2 Genie sem var framleidd í Bandaríkjunum á árunum 1958 til 1985. Var eldflaugin hönnuð til að geta borið 1,5 kílótonna kjarnaodd, en það jafngildir sprengikrafti 1.500 tonna af sprengiefninu TNT.

Sem betur fer var enginn kjarnaoddur á eldflauginni og ekkert eldsneyti og var eldflaugin því algjörlega hættulaus.

Það var safn bandaríska flughersins í Dayton í Ohio sem hafði samband við lögreglu, en það gerðist eftir að nágranna hins látna áskotnaðist eldflaugin frá aðstandendum mannsins.

Í frétt AP kemur fram að bandaríski herinn hafi ekki óskað eftir því að fá eldflaugina til sín og því geti safn flughersins í Dayton fengið eldflaugina til sín.