Óttast er að bandarísk hjón, Ralph Hendry og Kathy Brandel, hafi verið myrt af þremur strokuföngum þegar þau sigldu skútu sinni um Karíbahafið á dögunum.

Ekkert hefur spurst til hjónanna síðan 18. febrúar síðastliðinn þegar þau komu til hafnar á Grenada í suðausturhluta Karíbahafsins. Þann sama dag sluppu þrír fangar, 30, 20 og 19 ára úr fangelsi á eyjunni og er talið að þeir hafi stolið skútunni og drepið hjónin.

Ralph og Kathy voru bæði hætt að vinna og hugðust eyða eftirlaunaárunum í siglingar um heimsins höf á snekkjunni Simplicity. Sigldu þau frá heimili sínu í Virginíu og suður í Karíbahaf.

Snekkjan fannst á eyjunni St. Vincent síðastliðinn miðvikudag en Ralph og Kathy voru hvergi sjáanleg. Lögregla telur að til einhvers konar átaka hafi komið í skútunni enda fannst meðal annars blóð um borð. Þremenningarnir, sem sátu inni fyrir vopnað rán, voru handteknir fyrir helgi og eru þeir nú í haldi lögreglu.

Vinir og vandamenn hjónanna vonast til þess að þau finnist heil á húfi en vonin virðist vera lítil miðað við ummerkin um borð og þann tíma sem er liðinn síðan þau sáust síðast. Söfnun hefur verið sett af stað á vefnum GoFundMe og hafa tæpir 50 þúsund Bandaríkjadalir, tæpar sjö milljónir króna, safnast.

Kathy, sem var nýorðin amma í fyrsta sinn, hefði orðið 71 árs síðastliðinn miðvikudag, sama dag og snekkjan fannst.