Drengurinn byrjaði að finna fyrir einkennum þann 2. nóvember síðastliðinn og var lagður inn á sjúkrahús þann 8. nóvember. Rannsókn staðfesti að hann væri með fuglaflensu sem líklega er af stofninum H5N1.
Breska blaðið Guardian greinir frá þessu og segir að drengurinn dvelji á gjörgæsludeild barnaspítalans í Bresku-Kólumbíu með það sem kallast brátt andnauðarheilkenni (ARDS). Á Vísindavefnum segir að einkenni þess séu mikið bólgusvar og vefjaskemmdir og minnkuð geta lungnanna til að koma súrefni yfir í blóðið og þaðan til annarra vefja.
Talið er að þetta sé fyrsta tilvikið af þessu tagi sem kemur upp hjá manneskju í Kanada en flensan hefur greinst í alifuglum í Bresku-Kólumbíu að undanförnu. Drengurinn var heilsuhraustur áður en hann greindist og ekki með neina undirliggjandi sjúkdóma.
Heilbrigðisyfirvöld telja að almenningi stafi ekki hætta af smitinu enda engar vísbendingar um að flensan smitist á milli fólks. Ekki er talið að drengurinn hafi verið í beinni snertingu við smitaða alifugla en hann umgekkst þó „hunda, ketti og skriðdýr“ áður en hann byrjaði að sýna einkenni veikinda.
