Báturinn hans fannst mannlaus á vatninu og benti flest til þess að eitthvað hafi gerst sem varð til þess að hann drukknaði. Bíllinn hans fannst einnig á sínum stað, á bílastæði, við vatnið.
Umfangsmikil leit að líki hans skilaði engum árangri og heima sátu eiginkona og þrjú börn, sem allt í einu voru orðin föðurlaus, í sárum.
Það var svo síðastliðinn föstudag að lögregla tilkynnti á blaðamannafundi að hún hefði rökstuddan grun um að Ryan hefði sviðsett dauða sinn og farið til Evrópu til að hefja nýtt líf.
Í umfjöllun New York Post kemur fram að lögregla hafi komist á sporið snemma í október þegar hún tók tölvu Borgwardts til rannsóknar.
Við yfirferð á henni kom ýmislegt í ljós, til dæmis að hann hafði átt í samskiptum við ónefnda konu í Úsbekistan, opnað nýjan bankareikning og aflað sér upplýsinga um hvernig best væri að flytja fé úr landi. Þá hafði hann tilkynnt um týnt vegabréf og fengið nýtt afhent skömmu áður en hann hvarf. Gamla vegabréfið hans var heima.
Þegar lögregla tók tölvuna í sína vörslu kom reyndar í ljós að hann hafði hreinsað allt út af henni en stafræna fótsporið sem hann skildi eftir sig hvarf ekki. Rannsókn lögreglu leiddi einnig í ljós að daginn eftir að tilkynnt var um hvarf hans var leitað að nafni hans í gagnagrunni kanadísku lögreglunnar – sem bendir til þess að hann hafi verið kominn að landamærunum daginn eftir að hann hvarf.
Óvíst er hversu lengi Borgwardt skipulagði hvarf sitt en á blaðamannafundi lögreglu kom fram að hvarfið hafi augljóslega krafist töluverðrar skipulagningar.
Lögregla telur að Borgwardt sé einhvers staðar í Evrópu og er ekki vitað hvort hann hafi tekið upp nýtt nafn með fölsuðum skilríkjum. „Ryan, ef þú ert að horfa á þetta þá bið ég þig um að hafa samband við fjölskyldu þína. Við höfum skilning á því að ýmislegt gerist í lífinu en hérna eru börn sem vilja fá pabba sinn aftur,“ sagði lögreglustjórinn Mark Podoll á blaðamannafundinum á föstudag.
