Norska ríkisstjórnin íhugar að láta reisa girðingu við landamæri Noregs og Rússlands. Það var dómsmálaráðherrann Emilie Menger Mehl sem setti þessa tillögu fram. Hugmyndin er sótt til Finna en þeir eru nú að reisa 200 kílómetra langa girðingu við rússnesku landamærin en landamæri ríkjanna eru 1.340 kílómetrar að lengd.

Norska ríkisútvarpið skýrir frá þessu og hefur eftir Mehl að girðing á landamærunum sé mjög áhugaverð, ekki aðeins af því að hún muni hafa fælingaráhrif, heldur einnig að hún muni verða búin skynjurum og annarri tækni sem geri landamæravörðum kleift að uppgötva ef fólk sé á ferð við landamærin.

Hvað varðar lengd girðingarinnar sagði hún að ef af verður þá muni girðingin annað hvort rísa með fram landamærunum í heild sinni eða hluta þeirra.