Christian Brückner, 47 ára Þjóðverji, var í morgun sýknaður í sakamáli sem höfðað var gegn honum vegna gruns um fjölmörg kynferðisbrot. Brückner er grunaður um að hafa rænt Madeleine McCann í Portúgal árið 2007 og drepið hana en ákæra í málinu hefur þó ekki verið gefin út.

Sýknan í máli Brückner þýðir að möguleiki er á að hann geti um frjálst höfuð strokið strax á næsta ári.

Brückner var ákærður fyrir þrjár nauðganir og tvö kynferðisbrot gegn börnum í Portúgal á árunum 2000 til 2017. Áttu meint brot sér stað skammt frá Praia da Luz á Algarve þar sem Madeleine hvarf árið 2007.

Verjandi Brückners, Friedrich Fuelscher, sagði í lokaræðu sinni í umræddu sakamáli í gær, að saksóknarar hefðu ekkert í höndunum í fyrrnefndum ákærum. Eina ástæða þess að hann væri fyrir dómi væri grunur um að hann hefði haft eitthvað með hvarf Madeleine að gera.

Saksóknarar höfðu farið fram á 15 ára fangelsisdóm yfir Brückner og hafa þeir þegar gefið það út að sýknudómnum verði áfrýjað. Brückner er í fangelsi en hann afplánar nú fangelsisdóm sem hann hlaut fyrir nauðgun. Mun hann ljúka afplánun þess dóms í september á næsta ári en honum gæti þó verið veitt reynslulausn næsta vor.

Madeleine var þriggja ára þegar hún hvarf á sumarleyfisstað fjölskyldu sinnar á Algarve vorið 2007. Árið 2020 gáfu þýskir saksóknarar það út að Brückner væri grunaður um að hafa rænt henni og gengið væri út frá því að hún hefði verið myrt.

Þrátt fyrir það hefur lík Madeleine ekki fundist og Brückner staðfastlega neitað sök. Saksóknarar segjast þó ekki hafa gefist upp í málinu og vonast þeir til að safna nægum sönnunargögnum til að gefa út ákæru gegn Brückner.