Hefur þú tekið eftir því að fólk virðist oft lækka með aldrinum? Sumir byrja að bogna fram á við og lækka jafnvel um nokkra sentimetra. En hvað veldur þessu?

Ástæðan er blanda þess að beinin „éta“ hvert annað,  brjóskþynningar og vöðvarýrnunar. En hversu hratt þetta gerist er háð erfðum, næringu og hreyfingu fólks á lífsleiðinni.

Live Science hefur eftir Marian Hannan, sóttvarnalækni við Harvard, að fólk eldist misjafnlega líffræðilega en undantekningarlaust lækki það með aldrinum.

Í rannsókn, þar sem fylgst var með 2.084 körlum og konum í 35 ár, kom í ljós að fólk byrjaði að lækka um þrítugt og að þetta ferli varð hraðara með tímanum.

Karlmenn lækkuðu að meðaltali um 3 sentimetra en konur um 5 frá þrítugu og fram að sjötugu. Um áttrætt var lækkunin 5 sentimetrar hjá körlum og 8 sentimetrar hjá konum.