Camp Château var opnað fyrir ferðamönnum fyrir tveimur árum og eftir aðeins tveggja ára starfsemi er dagljóst að staðurinn hefur slegið í gegn sem sumarleyfisstaður. Nú eru 11.000 konur á biðlista eftir að komast í frí þar. Það þýðir að þær sem eru aftast á biðlistanum komast ekki í frí þar fyrr en eftir 20 ár.
Philippa Girling, eigandi og forstjóri staðarins, sagði í samtali við Euronews Travel að hún geti ekki annað en verið ánægð með vinsældirnar og biðlistann en um leið líði henni illa fyrir hönd þeirra sem hafa skráð sig á biðlistann en munu aldrei geta komist í frí í Camp Château vegna þess að það er 20 ára bið fram undan.
Það sem gerir Camp Château svo sérstakan sumarleyfisstað er ekki hið fagra umhverfi, sem skemmir auðvitað ekki fyrir, eða söguslóðirnar. Það eru gestirnir sem gera staðinn svo sérstakan en allir gestirnir eru kvenkyns og það er engin tilviljun að sá háttur er hafður á.
Girling fékk hugmyndina að því að opna sumarleyfisstað fyrir konur eftir að hafa starfað í bankageiranum í 30 ár en þar eru karlmenn mjög ráðandi. Hún vildi fara allt aðra leið þegar hún áttaði sig á að hún var orðin þreytt á að konur og minnihlutahópar þurfi að passa inn í ákveðið mynstur.
Boðið er upp á vikudvöl í höllinni. 50 konur geta dvalið þar samtímis og aldursbil gestanna er mikið. Yngsti gesturinn var 19 ára og elsta kona, sem hefur dvalið þarna, er tæplega áttræð.
Vikudvöl kostar sem svarar til um 320.000 íslenskra króna. Boðið er upp á fjölda viðburða. Til dæmis jóga, dans, stjörnuskoðun, útreiðar og ostasmökkun. En það er líka í fínu lagi að liggja bara við sundlaugina og slappa af með drykk.
Girling segir að dvölin snúist í einfaldleika sínum um að vera í ró og næði, vinna í sjálfri sér og losa sig við stress.
Gestirnir borða alltaf saman en hægt er að velja á milli þess að sofa í koju í höllinni eða í tveggja manna tjaldi á lóðinni.
