Stúlkan, sem heitir Arla og er búsett í Bretlandi, fékk sér ískrap í afmælinu og aðeins um hálftíma eftir að hafa fengið sér drykkinn fór stúlkunni að líða einkennilega. Kvartaði hún undan mikilli þreytu áður en líkami hennar varð gráleitur og hún missti meðvitund.
Stacey Agnew, amma stúlkunnar, segir í samtali við Daily Record að hún hafi drifið sig með stúlkuna á sjúkrahús þegar hún tók eftir því að ástandi hennar virtist hraka hratt. Á sjúkrahúsinu var stúlkan greind með glýseról-eitrun og alvarlegt blóðsykurfall.
„Ég óttaðist að hún myndi ekki lifa þetta af,“ segir Stacey en Arla missti meðvitund í bílnum á leiðinni á sjúkrahúsið. Sagði læknirinn, áður en Arla var útskrifuð af spítalanum, að ekki hafi mátt muna miklu að verr færi. Tuttugu mínútur í þessu samhengi hefðu getað skorið úr um líf eða dauða.
„Þetta var skelfilegur dagur. Ekki grunaði mig að ég gæti misst barnabarnið mitt út af ískrapi,“ bætir amman við.
Glýseról, E-422, í hóflegu magni er ekki hættulegt en vegna þess hversu mikið magn af því er í ískrapi getur það reynst varasamt fyrir börn. Meðal vægra eitrunareinkenna er höfuðverkur, ógleði og uppköst en alvarleg eitrunareinkenni geta valdið meðvitundarleysi.
Samkvæmt lögum í Bretlandi eiga framleiðendur að merkja sýróp sem notað er til ískrapsgerðar með viðvörun um mögulegar afleiðingar neyslu þess hjá ungum börnum. Engar slíkar merkingar var hins vegar að finna á sýrópinu sem notað var í afmælinu.
