Bandaríski aðgerðasinninn Leonard Peltier fær að vita það á næstu vikum hvort honum verði veitt reynslulausn úr fangelsi eftir að hafa setið á bak við lás og slá síðastliðin 46 ár.

Peltier var dæmdur í tvöfalt lífstíðarfangelsi fyrir morð á tveimur FBI-fulltrúum árið 1975. Peltier er frumbyggi og áður en hann var sakfelldur fyrir morðin var hann meðlimur í hópi sem berst fyrir réttindum amerískra frumbyggja.

Peltier var dæmdur fyrir að skjóta FBI-fulltrúana Jack Coler og Ron Williams til bana í Suður-Dakóta, en þangað voru þeir komnir til að handtaka mann vegna gruns um þjófnað. Skotið var á alríkisfulltrúana af nokkrum mönnum og létust Coler og Williams af sárum sínum.

Peltier var sá eini sem var sakfelldur í málinu en og var það meðal annars byggt á vitnisburði konu sem síðar dró vitnisburðinn til baka. Mannréttindasamtök á borð við Amnesty International hafa kallað eftir því að aðgerðasinnanum verði sleppt.

Peltier er orðinn 79 ára gamall og heilsuveill.

Bandaríska alríkislögreglan, FBI, hefur lagst gegn því að honum verði sleppt úr haldi og bendir á að málið hafi farið sína leið í bandaríska dómskerfinu. Eftir fjölda áfrýjana hafi niðurstaðan ætíð verið sú sama.