Hinum 12 ára Rory Bidwell hefur verið boðin aðild að Mensa samtökunum eftir að hann rúllaði greindarprófi upp. Greindarvísitala hans mælist hærri en hjá bæði Albert Einstein og Stephen Hawking en þeir eru af mörgum taldir einir mestu snillingar og gáfumenni síðari tíma.

Samkvæmt fréttum breskra fjölmiðla þá fékk Rory 162 í hinu svokallaða Cattell III B-prófi. Þetta er mesti stigafjöldi sem hægt er að fá í þessu prófi fyrir hans aldurshóp. Hann getur þar með stært sig af að tilheyra því eina prósenti fólks sem er með svona háa greindarvísitölu.

Einstein og Hawking urðu að sætta sig við að fá „bara“ 160 á samskonar prófi. Til samanburðar má nefna að meðalstigafjöldi fólks í prófum af þessu tagi er 100.

Í kjölfar þessarar frammistöðu Rory á prófinu var honum boðin aðild að Mensa sem eru alþjóðleg samtök mjög gáfaðs fólks.

Rory tók prófið, sem tekur tvær klukkustundir, án þess að hafa undirbúið sig sérstaklega undir það og án þess að vita tilganginn með því. Þvert á móti tókst hann rólegur á við prófið og gaf sér meira að segja tíma til að fara í rólegheitum á klósettið sagði móðir hans, Abi Bidwell, í samtali við North Devon Gazette.

Hún sagði að Rory sé svo lánsamur að vera með ótrúlegan heila sem geti leyst vandamál og munað upplýsingar.

Strax á unga aldri sýndi hann þess merki að hann væri sérstakur á þessu sviði. Hann gat púslað 100 púslum þegar hann var tveggja ára og þegar hann var í öðrum bekk fór hann létt með stærðfræði sem er kennd í sjöunda bekk.