Þingmaður á nýsjálenska þinginu hefur sagt af sér þingmennsku eftir að ásakanir um þjófnaði á vörum úr fataverslunum komu upp á yfirborðið. Kennir þingmaðurinn, sem sætir lögreglurannsókn, streitu vegna álags í starfi sínu um hegðun sína.

BBC greinir frá þessu.

Þingmaðurinn heitir Golriz Ghahraman og sat á þingi fyrir flokk Græningja. Hún er sökuð um að hafa stolið vörum þrisvar sinnum úr tveimur mismunandi fataverslunum á Nýja-Sjálandi, annarri í Auckland en hinni í Wellington.

Ghahraman sagði að streita sem tengdist starfi hennar hefði orðið til þess að hún hafi hagað sér á máta sem sé gjörólíkur hennar karakter. Hún segist hafa brugðist fjölda fólks og þyki þetta leitt.

Ghahraman starfaði áður sem mannréttindalögfræðingur hjá Sameinuðu þjóðunum. Hún er 42 ára gömul en þegar hún var barn flúði fjölskylda hennar frá Íran og fékk hæli á Nýja-Sjálandi. Hún var kjörin á þing 2017 og varð þá fyrsti flóttamaðurinn í sögunni sem náði kjöri á nýsjálenska þingið.

Ghahraman sagði af sér í kjölfar þess að birtar voru upptökur úr öryggismyndavél þar sem sjá má hana stela úr annarri versluninni.

Hún sagði í yfirlýsingu að hegðun hennar samræmdist ekki þeim ströngum viðmiðum sem ættu að gilda um kjörna fulltrúa.

Hún segist ekki geta skýrt hegðun sína á rökréttan hátt. Hún njóti aðstoðar sérfræðings á sviði andlegra veikinda og geri sér nú grein fyrir að hún gangi ekki heil til skógar en sé þó ekki að afsaka sig á nokkurn hátt. Sérfæðingurinn hafi tjáð henni að þessi hegðun hennar sé viðbrögð við nýliðnum atburðum sem orsakað hafi mikla streitu hjá henni vegna tenginga þeirra við fyrri áföll sem hún hafi orðið fyrir.

Annar af leiðtogum flokks Græningja, James Shaw, segir að síðan Ghahraman var kjörin á þing hafi hún sætt stöðugum hótunum um kynferðislegt og líkamlegt ofbeldi auk morðhótana. Þar af leiðandi hafi hún verið haldin mun meiri streitu en aðrir þingmenn. Lögreglan hafi rannsakað hótanir í hennar garð nánast allan tímann sem hún sat á þingi. Það sé augljóst að einstaklingur sem þurfi að lifa við slíkt verði haldinn mikilli streitu og það geti haft afleiðingar.