Í síðustu viku var stórt skref stigið varðandi ígræðslur líffæra úr dýrum í fólk. Þá var erfðabreytt svínshjarta grætt í hinn 58 ára Lawrence Faucette. Þetta var í annað sinn sem svínshjarta var grætt í manneskju. Hjartar starfar vel og „án aðstoðar tækja“.

Áður hafði svínshjarta verið grætt í heiladautt fólk í Bandaríkjunum en aðeins einu sinni áður í manneskju sem ekki var heiladauð.

Ígræðslan var framkvæmd á háskólasjúkrahúsinu Maryland háskólans í Baltimore. Það var einmitt þar sem fyrsta aðgerðin af þessu tagi var gerð.

Á síðasta ári lést David Bennett, 57 ára, eftir að svínshjarta var grætt í hann. Að sögn talsmanna sjúkrahússins voru það nokkrir þættir sem gerðu að verkum að hann lést. Meðal annars slæmt heilsufar hans áður en ígræðslan fór fram.

Lawrence Faucette átti ekki rétt á að fá mannshjarta grætt í sig því biðlistinn eftir mannshjarta er svo langur og læknar mátu það sem svo að það væru mjög litlar líkur á að nýtt hjarta myndi virka í Faucette. Án nýs hjarta, blasti fátt annað við honum en dauðinn.

„Eina von mín er að fá svínshjarta. Nú hef ég að minnsta kosti von og ég á möguleika,“ sagði Faucette áður en hann var svæfður fyrir aðgerðina.

Skortur á líffærum er mikið vandamál í Bandaríkjunum en rúmlega 100.000 manns eru á biðlista eftir líffæraígræðslu.

TV2 segir að sérfræðingar segi að ígræðsla líffæra úr dýrum geti verið hluti af lausninni á þessum vanda en þetta er erfitt í framkvæmd því yfirleitt hafnar mannslíkaminn ígræddum líffærum og reynir í sumum tilfellum að skemma þau.

Vísindamenn reyna nú að komast fram hjá þessu vandamáli með því að nota erfðabreytt svín og lyf sem eiga að koma í veg fyrir að líkaminn hafni og skemmi ígrætt hjarta. Aðferðin hefur verið prófuð á heiladauðum sjúklingum í New York síðustu ár. Fyrr í mánuðinum var met sett þegar heiladauður sjúklingur lifði í 61 dag með erfðabreytt svínshjarta.