Ítölsk yfirvöld segja að þarna hafi einfaldlega verið „hugguleg“ afmælisveisla í gangi en upplýsingarnar um þá sem voru um borð hafa vakið upp grunsemdir um að afmælisveislan hafi verið skálkaskjól fyrir eitthvað allt annað.
Ítalskir fjölmiðlar segja að allir farþegarnir hafi verið starfandi leyniþjónustumenn eða fyrrum leyniþjónustumenn. Tæplega helmingur þeirra var frá ítölsku leyniþjónustunni ASIE en hinn helmingurinn frá ísraelsku Mossad leyniþjónustunni.
Slysið varð þegar báturinn átti um 100 metra ófarna að landi. Þá snarversnaði óveður, sem geisaði á vatninu, skyndilega og gríðarleg úrkoma, regn og hagl, buldi á húsbátnum. Margir neyddust til að kasta sér fyrir borð og synda í land til að bjarga lífi sínu. Öðrum var bjargað úr vatninu en húsbáturinn sökk.
Fjórir létust. Tveir ítalskir leyniþjónustumenn, einn fyrrverandi liðsmaður Mossad og rússnesk eiginkona skipstjórans.
Yfirvöld hafa vísað því á bug að um skemmdarverk hafi verið að ræða en því hefur verið velt upp hvort skipstjórinn hafi hunsað stormviðvörun sem var send út.
Auk skipstjórans og eiginkonu hans voru 21 leyniþjónustumaður um borð í bátnum sem var 16 metra langur og mátti að hámarki taka 15 farþega.
Ekki dregur það úr dulúðinni í kringum málið að ísraelsku leyniþjónustumennirnir voru fluttir úr landi í skyndi með einkaflugvél skömmu eftir slysið. ANSA fréttastofan segir að vélin sem var notuð sé notuð til „viðkvæmra“ flutninga.
Corriere Della Sera segir að ítalska leyniþjónustan hafi einnig gengið hratt til verks til að koma í veg fyrir upplýsingaleka. Starfsmenn hennar voru fluttir af sjúkrahúsum, sem þeir höfðu verið lagðir inn á, til að koma í veg fyrir að fjölmiðlar kæmust yfir upplýsingar um þá.
