Talið er hugsanlegt að mörg þúsund manns hafi tapað háum fjárhæðum eftir að hafa fjárfest í rafmynt með rafmyntaappinu iEarn Bot. Sérfræðingar telja hugsanlegt að þetta sé eitt stærsta svikamálið, tengt rafmynt, til þessa.

BBC skýrir frá þessu. Viðskipti með rafmynt hafa verið mjög vinsæl og er fólki oft lofað hárri ávöxtun á skömmum tíma.

Löggæslustofnanir hafa varað við sívaxandi fjölda svikamála í tengslum við kaup og sölu rafmynta og ráðleggja fólki að fara varlega.

Sérfræðingar segja að um 800.000 manns hafi notað appið og hafi þeir verið um allan heim. iEarn Bot sagðist vera staðsett í Bandaríkjunum en við skoðun BBC á heimasíðu þess sást margt athugavert. Til dæmis að maðurinn sem er sagður stofnandi þess á heimasíðunni, hafði aldrei heyrt um fyrirtækið.