Bíleigandi einn, sem býr í Stenlille í Danmörku, fór heldur óvenjulega leið á laugardaginn þegar hann ætlaði að hita bílinn sinn upp, eða öllu heldur rafhlöðu hans. Þetta reyndist dýrkeypt því bíllinn eyðilagðist í eldi og íbúðarhús skemmdist.

Af einhverjum ástæðum þótti bíleigandanum það snjallræði mikið að koma brauðrist fyrir undir rafhlöðu bílsins og kveikja á henni til að láta hana hita rafhlöðuna upp. En þetta gekk nú ekki alveg upp og það kviknaði í bílnum.

Hann stóð í bílskýli þegar þetta gerðist og læsti eldur sig í það og íbúðarhúsið sem skemmdist.

Lögreglan skýrði frá þessu í tilkynningu og notaði tækifærið til að hvetja bíleigendur til að láta algjörlega eiga sig að nota þessa aðferð til að hita rafhlöðu bíla.