Kona í Atlanta í Bandaríkjunum hefur játað að hafa dregið sér fé sem nemur meira en 4 milljónum dollara ( 550 milljónum íslenskra króna) frá Facebook á meðan hún starfaði hjá fyrirtækinu.

Þetta kemur fram í fréttum CNN.

Konan heitir Barbara Furlow-Smiles og starfaði hjá Facebook á árunum 2017-2021. Meðal verkefna hennar voru mannauðsmál, stefnumótun og að starfa að málum sem vörðuðu fjölbreytileika á heimsvísu.

Saksóknaraembættið á svæðinu segir Furlow Smiles hafa misnotað það traust sem henni var sýnt með því að svíkja fé út úr fyrirtækinu.

Starfs sín vegna var Barbara Furlow-Smiles með aðgang að sérstökum reikningi hjá fyrirtækinu sem ætlaður var  einkum fyrir risnu og útgjöld sem hún þurfti að ráðast í vegna starfsins. Hún misnotaði reikninginn hins vegar í sína persónulegu þágu og fjármagnaði íburðarmikinn lífstíl sinn. Hún notaði reikninginn til að greiða meðal annars fyrir hárgreiðslu, barnfóstur og skólagjöld í leikskóla.

Furlow-Smiles gerði þetta einkum með því að tengja fyrirtækja-greiðslukort sem hún var með við greiðsluöpp eða vefsíður sem hægt er að nota til að annast greiðslur. Þetta voru PayPal, Venmo og Cash App. Hún notaði síðan kortin til að greiða öðrum fyrir þjónustu, við Facebook, sem aldrei var innt af hendi. Oft var um að ræða ættingja og vini sem greiddu hluta af upphæðunum sem runnu til þeirra til baka til Furlow-Smiles sem eins konar mútur.

Furlow-Smiles bjó til falska reikninga til að greiðslurnar myndu líta eðlilega út í bókhaldi Facebook. Saksóknaraembættið segir að hún hafi dregið vini sína og ættingja inn í þessa glæpastarfsemi til að fjármagna kostnaðarsamann lífsstíl sinn í stað þess að vinna heiðarlega fyrir honum.

Dómur yfir Barbara Furlow-Smiles verður kveðinn upp í mars á komandi ári.