Samkvæmt fréttum CNN og The New York Times þá hófst málið eiginlega á þriðjudagskvöldið þegar lögreglumenn voru sendir að húsi í Tarzana. Byggingaverkamaður hafði tilkynnt lögreglunni að hann hefði séð lík í plastpoka. En eftir því sem talsmaður lögreglunnar sagði þá fundu lögreglumennirnir ekkert þegar þeir komu á vettvang. Engin sönnunargögn hafi verið sem gerðu þeim kleift að réttlæta að fara inn í húsið.
En eins og áður sagði þá fannst lík í ruslagámi daginn eftir. Þetta var lík af konu. Kennsl hafa ekki enn verið borin á það með fullri vissu en talið er að það sé af hinni 37 ára Mei Li Haskell sem býr í húsinu í Tarzana.
Eiginmaður hennar er hinn 35 ára Samuel Haskell. Hann er sonur Emmyverðlaunahafans og umboðsmannsins Sam Haskell III. CNN segir að hann hafi meðal annars verið umboðsmaður Whoopi Goldberg, Dolly Parton og George Clooney.
Mei og Samuel eru skráð til heimilis í fyrrnefndu húsi í Tarzana ásamt þremur börnum sínum. þegar lögreglan leitaði í húsinu á miðvikudaginn fannst hvorki tangur né tetur af Mei.
Þar með er ekki öll sagan sögð því foreldrar Mei búa einnig í húsinu. Þau eru 71 og 64 ára. Þau eru bæði horfin.
Samuel er nú í haldi lögreglunnar, grunaður um að hafa myrt eiginkonu sína og tengdaforeldra.
