Kona beinir myndavélinni að unnusta sínum og spyr: „Elskan, hversu oft hugsar þú um Rómarveldi?“ Hann horfir undrandi á hana og segir svo: „Svona tvisvar á dag.“
Þessa dagana spyrja konur um allan heim unnusta sína, bræður og feður að þessu. Þetta nýja trend hefur breiðst hratt út á TikTok og nú þegar hefur myllumerkið #romanempire verið notað 1,6 milljarða sinnum.
Ef trúa má myndböndunum á TikTok þá virðast karlmenn hugsa ótrúlega oft um Rómarveldi.
En hugsa karlmenn virkilega svona oft um Rómarveldi? TV2 leitaði til Christian Groes, lektors við Hróarskelduháskóla, sem vinnur að rannsóknum á hegðun kynjanna. Hann sagði ekki útilokað að karlar hugsi oft um Rómarveldi en sagðist þó sjálfur ekki hugsa oft um Rómarveldi, það gerist einna helst ef hann sér heimildarmynd um það.
Hvað varðar skýringu á því að karlar hugsi kannski oft um Rómarveldi sagði hann að það geti snúist um að þeir heillist af stríði og heimsveldum. En einnig snúist þetta um karlmennskuímynd, Rómarveldi sé ákveðin táknmynd fyrir karlmennskuímyndina til forna. Á tíma þess hafi karlmenn verið hermenn, snjallir, flottir, hafi unnið sigra og verið hylltir. Af þeim sökum dreymi karla kannski um þann tíma.
Hann sagði eiginlega ekki undarlegt að hugsanir af þessu tagi leiti á karla nú. Nú séu margar krísur í heiminum og af þeim sökum liggi kannski beint við að láta sig dreyma um tíma þar sem sigrar unnust og heimsveldi réðu lögum og lofum.
