Það var ansi ábatasamt fyrir Geoff Morell að standa sig ekki nægilega vel í vinnunni. Hann var ráðinn til Disney Corporate Affaris þann 24. janúar á síðasta ári. Hann stoppaði ekki lengi við því í apríl var hann rekinn.

Þessi misheppnaða ráðning kostaði Disney 150.000 dollara á dag en það svarar til um 21,5 milljóna íslenskra króna. Í heildina kostaði þessi skammvinna ráðning Disney sem svarar til tæplega 1,5 milljarða íslenskra króna að sögn CNN Business og byggir þetta á tilkynningu Disney til kauphallarinnar.

„Fáir yfirmenn hafa staðið sig svona illa í vinnunni á svo skömmum tíma og grætt jafn mikið á því og Geoff Morell,“ segir CNN.

Það eru margir þættir sem gera að verkum að kostnaðurinn við þriggja mánaða starfstíma Morell var svona hár. Laun hans og bónusgreiðslur á þeim fimm mánuðum, sem hann var á launaskrá Disney, voru samtals sem nemur um 1,2 milljörðum íslenskra króna. Upphæðin lækkaði um sem svarar til um 290 milljóna króna  því hann náði ekki að uppfylla öll þau markmið sem kveðið var á um í ráðningarsamningi hans.

Disney keypti einnig heimili Morell á 650 milljónir króna til að hlífa honum við hugsanlegum verðlækkunum á fasteignamarkaði. Disney á húsið enn svo ekki liggur fyrir hvort fyrirtækið mun tapa á kaupunum eða hagnast.

Disney keypti Morell út úr ráðningarsamningi hans og greiddi honum 580 milljónir króna fyrir það.

Þegar þetta er allt lagt saman er kostnaðurinn við ráðningu hans 1,5 milljarðar.