Á myndum virðist hún oft vera blíð og hlédræg en að sögn Sung-Yoon Lee, rithöfundar, þá blekkja myndirnar og segist hann ekki í nokkrum vafa um hvaða konu hún hefur að geyma.
Í samtali við CNN og Fox News sagði hann að hún sé blítt andlit grimmdarlegrar einræðisstjórnar Norður-Kóreu út á við en þar ráði grimmd og karlremba. „En það þarf að taka hana mjög alvarlega. Núna er hún hættulegasta kona kona heims. Og kannski hættulegasta kona sem nokkru sinni hefur verið uppi,“ sagði hann.
Þessi lýsing er einnig undirtitill á nýrri bók hans um Kim Yo-jong, sem heitir „The Sister“. Þar fjallar hann um hana og störf hennar. Hún hefur frekar hógværan titil sem stjórnandi norðurkóresku áróðursmaskínunnar en í raun er hún talin vera næstvaldamesta manneskja landsins.
„Hún er mjög valdamikil kona . . . með metnað,“ segir Sung-Yoon Lee.
Í nýlegri heimsókn systkinanna til Rússlands sást Kim Yo-jong meðal annars beygja sig yfir bróður sinn þegar hann var að skrifa í gestabók.
Samband þeirra er náið og af þeim sökum hefur hún nánast ótakmörkuð völd.
„Fræðilega séð getur hún ákveðið hverjum á að fylgjast með, lækka í tign, hækka í tign, refsa, verðlauna, vísa úr landi eða jafnvel binda og taka af lífi á torgi úti eða á lokuðum leikvangi,“ segir í „The Sister“.
Hún hefur einnig aðgang að öllu hernaðarbatteríi landsins og getur því fyrirskipað notkun kjarnorkuvopna en ráðamenn í landinu hafa oft í hótunum um að beita þeim og þar dregur Kim Yo-jong ekki af sér í orðaskakinu.
