Sky News skýrir frá þessu og segir að maðurinn, Ishmael Duncan 24 ára, hafi notað Snapchat til að komast í samband við fórnarlömb sín og hafa í hótunum við þau. Hann hefur játað 50 brot.
Hann var handtekinn í júlí 2021 í suðurhluta Lundúna. Hann var þá með kynferðislegt myndefni í fórum sínum sem og skrá yfir samskiptasögu hans á Internetinu. Lögreglan hlóð síðan myndum og samskiptum hans niður úr tölvubúnaði hans og geymslusvæðum á netinu.
Fórnarlömb hans voru 28 talsins. Það yngsta 9 ára. Þau voru meðal annars frá Bretlandi, Kanada, Ástralíu og Bandaríkjunum. En lögreglan telur að hann hafi sett sig í samband við allt að 10.000 börn en lögreglan fann rúmlega 19.000 kynferðislegar myndir í tölvubúnaði hans og netsvæðum.
Lögreglan segir að Duncan hafi byrjað á að spyrja stúlkurnar hvort þær vildu starfa sem fyrirsætur fyrir þekkt merki. Síðan spurði hann þær um aldur og aðrar persónulegar upplýsingar og bað þær um að senda myndir af þeim fullklæddum.
Í kjölfarið fylgdu viðtöl og síðan sendi hann þeim samninga, sem litu út fyrir að vera löglegir. Því næst bað hann þær um að senda myndir af þeim berum að ofan því nota þyrfti þær til að leggja mat á lögun líkamans. Ef stúlkurnar spurðu, þá sagði hann að myndunum yrði eytt en öðrum hótaði hann að setja á svartan lista svo þær myndu aldrei fá starf sem fyrirsæta ef þær sendu ekki umbeðnar myndir.
Dómari mun tilkynna um refsingu hans þann 1. desember næstkomandi.
