Þýsk yfirvöld hafa tekið þá ákvörðun að fjórum börnum verði vísað úr landi þar sem dvalarleyfi þeirra hafi verið tengt dvalarleyfi foreldra þeirra.  En móðir þeirra er látin því faðir þeirra myrti hana í október á síðasta ári.

Fjölskyldan er frá Víetnam. Foreldrarnir ráku veitingastað í Bad Schwartau nærri Lübeck. Það var þar sem fjölskyldufaðirinn myrti eiginkonu sína fyrir framan börnin fjögur.

Hann er faðir yngstu barnanna tveggja, sem eru 3 og 4 ára, og stjúpfaðir 8 ára drengs og 12 ára stúlku. Hann var dæmdur í tíu ára fangelsi fyrir morðið.

Samkvæmt ákvörðun yfirvalda á að senda börnin til Víetnam. SHZ skýrir frá þessu og hefur eftir Timo Gaarz, æðsta embættismanninum í Bad Schwartau, að búið sé að fara vel í gegnum málið og niðurstaðan sé að það þjóni hagsmunum barnanna best að leyfa þeim að alast upp hjá ættingjum sínum í Víetnam, í þarlendri menningu og tungumálaumhverfi.

Börnin fjögur eru nú í umsjá fósturfjölskyldna í Bad Schwartau, nærri hvert öðru. Það er kannski engin furða að fósturfjölskyldunum er illa brugðið vegna málsins. „Börnin hafa alist upp hér og tala ekki eitt orð í víetnömsku. Það á að koma þeim fyrir hjá ókunnugu fólki í framandi menningarheimi,“ sagði Gabi Roks, fósturmóðir átta ára drengsins.

Fósturfjölskyldurnar hafa hrundið undirskriftasöfnun af stað til að reyna að hafa áhrif á ákvörðun yfirvalda. Nú þegar hafa tugir þúsunda skrifað undir hana.