James Webb geimsjónaukinn náði nýlega myndum af hver á Enceladusi, einu tungla Satúrnusar, spúa vatni langt út í geim. Í þessum vatnsstróki gætu leynst sum þeirra efna sem eru nauðsynleg til að líf geti myndast.

Eftir því sem segir í umfjöllun Live Science um málið þá náðust myndirnar í nóvember á síðasta ári en vísindamenn skýrðu fyrst frá þeim á ráðstefnu í Baltimore um miðjan maí.

Sara Faggi, stjörnufræðingur hjá Goddard Space Flight Center hjá NASA, sagði á ráðstefnunni að strókurinn hafi verið gríðarlega stór og að verið sé að vinna að vísindagrein um málið.

Þetta var ekki í fyrsta sinn sem vísindamenn sáu Enceladus spúa vatni en þar sem James Webb sjónaukinn er með miklu breiðara sjónsvið og mun nákvæmari en forverar hans þá sáu vísindamenn að strókurinn náði miklu lengra út í geim en þeir höfðu talið til þessa.

Vísindamenn sáu í stróka af þessu tagi frá Enceladus í fyrsta sinn árið 2005 þegar  Cassini geimfar NASA náði myndum af ísögnum skjótast upp í gegnum stórar sprungur á yfirborði tunglsins. Þessir strókar eru svo öflugir að efni úr þeim myndar einn af hringjum Satúrnusar að sögn NASA.