Sverð Tipu Sultan, sem var frægur konungur á Indlandi á átjándu öld, var nýlega selt á uppboði í Lundúnum. Söluverðið var 14 milljónir punda en það svarar til um 2,3 milljarða íslenskra króna.

Tipu var þekktur fyrir að hafa stýrt hersveitum sínum í stríðum í suðurhluta Indlands.

Söluverðið var sjöfalt hærra en reiknað var með að sögn CNN. Um leið var sett nýtt sölumet hvað varðar hæsta söluverð indversks eða íslamsks hlutar á uppboði að því er segir í tilkynningu frá uppboðshúsinu Bonhams.

Í tilkynningunni segir að sverðið eigi sér einstaka sögu og sé ótrúlega fallegt og vel gert.

Það voru þrír aðilar sem börðust um sverðið og var sá sem best bauð reiðubúinn til að greiða 2,3 milljarða fyrir það.

Tipu var konungur Mysore í suðurhluta Indlands frá 1782 til 1799. Hann fékk viðurnefnið „Tiger of Mysore“ vegna þess hversu grimmdarlega hann varði konungsríki sitt.

Breskir hermenn felldu Tipu í maí 1799 þegar þeir réðust á Seringapatam, sem var höfuðborg ríkis hans. Sverðið dýra fannst í vistarverum hans í höllinni og var gefið David Baird, hershöfðingja, í þakklætisskyni fyrir hugrekki hans.