Bobi, elsti hundur heims, fagnaði 31 árs afmæli sínu í vikunni. Bobi er auk þess elsti hundur sem vitað er til að hafa lifað en hann var sæmdur titlunum af heimsmetaskrá Guinness í febrúar.

Í tilkynningu frá Guinnes er haft eftir eiganda Bobi, Leonel Costa, að í gær  hafi verið slegið upp veislu fyrir öldunginn í heimabæ hans Conqueiros í suðurhluta Portúgal og var ráðgert að um 100 gestir myndu mæta.

Samkvæmt Costa er Bobi við hestaheilsu  miðað við aldur. Hann á erfitt með gang og sjónin er farinn að daprast en Costa hefur helst áhyggjur af því að allt áreitið sem Bobi verður fyrir, sem heimsþekktur hundur, verði honum um megn.

Bobi er af portúgölsku smalategundunni Rafeiro do Alentejo en eigandinn telur að rólegt umhverfi í smábænum sé helsta ástæðan fyrir langlífi Bobi gamla.