Borgarstjórnin í hollensku borginni Haarlem, sem er vestan við Amsterdam, hefur ákveðið að banna kjötauglýsingar á almannafæri frá og með 2024. Ástæðan er að kjöt er talið eiga stóran hlut að máli varðandi loftslagsbreytingarnar. Borgin er sú fyrsta í heimi sem bannar auglýsingar af þessu tagi.

The Guardian segir að bannað verði að auglýsa kjöt á strætisvögnum, strætóskýlum og auglýsingaskjám á almannafæri.

Kjötframleiðendur hafa brugðist illa við þessu og segja að með þessu séu borgaryfirvöld að ganga of langt í að segja fólki hvað sé gott fyrir það.

Rannsóknir benda til að matvælaframleiðsla eigi sök á þriðjungi allrar losunar gróðurhúsalofttegunda og að kjötframleiðsla mengi tvöfalt meira en framleiðsla á plöntufæði.

Ziggy Klazes, úr flokki Græningja, sem lagði tillöguna um bannið fram, sagðist ekki hafa vitað að borgin verði sú fyrsta í heimi til að banna kjötauglýsingar á almannafæri þegar hún lagði tillöguna fram.