Mjög líklegt þykir að til hungursneyðar komi á tveimur svæðum í Sómalíu síðar á árinu vegna miskunnarlausra þurrka og átaka. Staðan er svo slæm að mati Martin Griffiths, yfirmanns hjá neyðarhjálp SÞ, að hann telur að tíminn sé að renna út til að bjarga mannslífum.

The Guardian segir að Griffiths hafi sagt að nýjasta greining SÞ á stöðu mála sýni að „beinar vísbendingar“ séu um að til hungursneyðar komi í Baidoa og Burhakaba héruðunum einhvern tímann á tímabilinu frá október til desember.

Á ráðstefnu í Mogadishu sagði hann að hungursneyð sé við þröskuldinn og heimsbyggðin hafi nú fengið lokaaðvörun. Líklegt er talið að hungursneyð ríki að minnsta kosti fram í mars.

Fjögur síðustu regntímabil hafa brugðist og af þeim sökum hafa mörg hundruð þúsund manns hrakist að heiman. Það hefur valdið auknum þrýstingi á veikburða innviði þessa stríðshrjáða lands.

Griffiths sagði að það sem er í uppsiglingu líkist hungursneyðinni 2010-2011 sem varð tæplega 260.000 manns að bana, helmingur þeirra var börn.