Daily Mail skýrir frá þessu og bendir á að það sé slíkt sem hafi átt sér stað í lok fyrir heimsstyrjaldarinnar þegar svipuð veira og sú sem nú herjar á fugla barst í fólk. Úr varð Spænska veikin. Talið er að allt að 50 milljónir manna hafi látist af hennar völdum eða 1 af hverjum 35 jarðarbúum.
Daily Mail segir að nú hafi fuglaflensa greinst í rúmlega 22 milljónum fugla síðan í september á síðasta ári sem sé tvöfalt hærri talan en árið á undan. Veiran dreifi sér hraðar en áður og verði fleiri fuglum að bana og telji sumir sérfræðingar að þetta sé banvænasta afbrigði veirunnar til þessa.
Paul Hunter, prófessor í smitsjúkdómum við East Anglia háskólann, sagði að það sé ekki spurning um „hvort fuglaflensa berist í fólk og valdi faraldri, það sé spurning um hvenær“. Í samtali við MailOnline sagðist hann ekki vilja giska á hvort það gerist á hans æviskeiði eða æviskeiði barnabarna hans. „Þetta eru sjaldgæfir atburðir og það er aldrei hægt að spá fyrir um hvenær þeir eiga sér stað en þeim mun meira sem er af þessu, þeim mun meiri hætta,“ sagði hann.
Keith Neal, prófessor emiritus í farsóttafræði smitsjúkdóma við Nottingham háskóla, sagðist telja að mesta hættan í vetur verði venjulega flensan. Ónæmiskerfi okkar séu líklega veikburða eftir tveggja ára sóttvarnaaðgerðir og lítinn umgang við annað fólk. Því geti saklausar veirur orðið skæðar. Hann sagði vitað að venjulega flensan komi í vetur og fuglaflensa sé á sjóndeildarhringnum og geti komið. „Þeim mun meira sem verður um venjulega flensu og fuglaflensu, þeim mun meiri hætta á að þær muni enda saman og valda stórum erfðafræðilegum breytingum,“ sagði hann.
