Sky News hefur eftir lögreglunni að fólkið hafi veikst skyndilega og misst meðvitund.
Ekki hefur verið skýrt frá dánarorsök fólksins en hótelgestur segir að grunur leiki á að „eiturefni“ hafi lekið úr loftkælingunni.
Nokkrir gestir þurftu að leita til læknis vegna flökurleika og uppkasta daginn áður en fólkið lést.
Vincent Chiarella, frá Birmingham í Alabama, er meðal hinna látnu. Hann var að fagna afmæli sínu ásamt eiginkonu sinni Donnis. Sonur þeirra, Austin, sagði í samtali við ABC News að starfsfólk bandaríska sendiráðsins hefði haft samband við hann og hann hefði getað rætt við móður sína sem var flutt með flugvél á sjúkrahús í Flórída. Hún hafi sagt honum að hún hafi vaknað og hafi faðir hans þá legið á gólfinu. Sjálf hafi hún ekki getað hreyft sig. Handleggir hennar og fætur hafi verið bólgnir. Hún hafi öskrað á hjálp.
Chester Cooper, starfandi forsætisráðherra Bahamaeyja, sagði að enn liggi ekki fyrir hver dánarorsök fólksins sé en ekki leiki grunur á að eitthvað glæpsamlegt hafi átt sér stað.
