CNN segir að Rob hafi verið að skipta um klósettpappírsrúllustand þegar hann sá glitta í pappír inni í veggnum. Hann taldi ekki útilokað að hér væri um sönnunargögn úr sakamáli að ræða og var undir það búinn að hringja í lögregluna. Honum létti þó mikið þegar hann sá að um poka frá McDonalds var að ræða.
Hjónin náðu pokanum út úr veggnum og opnuðu hann. Í honum voru umbúðir utan af tveimur hamborgurum og nokkrar franskar kartöflur. „Við sáum frönsku kartöflurnar og hugsuðum: „Þetta er ótrúlegt.“ Af hverju eru frönsku kartöflurnar enn í pokanum og í svona góðu standi?“ sagði Gracie í samtali við CNN.
Á ljósmynd af kartöflunum sést að þær eru aðeins brúnar en annars virðast þær hafa geymst ansi vel. Hér er hægt að sjá mynd af þeim.
Lógóið á umbúðunum var notað af McDonalds á árunum 1955 til 1961. Maturinn er því að minnsta kosti 61 árs.
Hjónin vita ekki alveg hvað þau eiga að gera við matinn og umbúðirnar en segjast reiðubúin til að selja ef einhver vill kaupa. Að öðrum kosti haldi þau þessu sjálf sem sögulegum minjum.
