Japanska ferðamálastofnunin tilkynnti í gær að nú í maí verði byrjað að hleypa litlum hópum ferðamanna inn í landið. Það er hluti af því að „prófa“ hvernig er hægt að takast á við straum ferðamanna til landsins með tilliti til heimsfaraldurs kórónuveirunnar.

Ferðamannastofnunin sagði að tilraunin verði notuð til að leggja mat á heilbrigðis- og öryggismál og hvernig á að takast á við COVID-19 hjá ferðamönnum.

Til stóð að hefja þessa „prófun“ í lok síðasta árs en henni var frestað vegna hertra ráðstafana á landamærunum vegna Ómíkronafbrigðis veirunnar. Nú verður opnað fyrir komu þríbólusettra ferðamanna frá Ástralíu, Singapúr, Taílandi og Bandaríkjunum.

Ferðamálastofnunin mun koma að skipulagningu ferðanna í samvinnu við ferðaskrifstofur.

Vaxandi þrýstingur hefur verið bæði innanlands og utan á stjórnvöld um að opna landamærin.

Samkvæmt núgildandi reglum mega 10.000 manns koma til landsins á sólarhring en almennir ferðamenn mega ekki koma. Það eru japanskir ríkisborgarar, íbúar í landinu, vísindamenn, námsmenn og kaupsýslumenn sem mega koma. Sumir þurfa að fara í sóttkví við komuna en það fer eftir frá hvaða landi þeir koma.